Навінка ад «Звязды»

Цудоўная навіна для аматараў чытання! У Выдавецкім доме «Звязда» ўбачыла свет кніга Уладзіміра Бабкова «Янот-пілот».

Яго вершы складныя і вясёлыя. Яны лёгка завучваюцца, і мы ўпэўнены, іх змалку любяць і помняць шматлікія чытачы, сёння ўжо бабулі і дзядулі. Хіба можна ўстрымацца, каб, прачытаўшы, не паўтарыць з усмешкай і раз, і два:

Зай вусаты –

Добры тата:

Робіць лыжы

Зайчанятам.

Не дагоніш,

Цюцька рыжы, –

Зайчаняты ўсе

На лыжах!

Сонечныя, лаканічныя, займальныя, напісаныя з дабрынёй, цёплым гумарам, з мноствам трапных назіранняў і паэтычных знаходак, вершы Уладзіміра Бабкова даўно ўвайшлі ў вялікую колькасць зборнікаў і школьныя чытанкі.

Героі кнігі Уладзіміра Бабкова – непаседлівыя і вынаходлівыя хлопчыкі і дзяўчынкі. Нехта з іх бачыў НЛА, а нехта – сон на дваіх, хтосьці хоча зрабіць ЭВМ, а хтосьці пашыць сукенку для любімай лялькі. Не адстаюць ад іх і звяры ў казках: то адкрываюць у бары музычную школу, то дружна выходзяць на лыжны крос.

Тым, хто пачне чытаць кнігу «Янот-пілот», сумна не будзе, і асабліва спадабаюцца прасякнутыя святлом і любоўю да людзей і ўсяго навакольнага свету вершы і казкі таленавітага аўтара, лаўрэата Літаратурнай прэміі імя Кірылы Тураўскага Уладзіміра Бабкова, які і дагэтуль, на восьмым дзясятку гадоў, не страціў натхнення і захаплення родным словам.

Запрашаем у чароўны свет маленства, сяброўства і прыгод, дзе жывуць героі добрых кніг.

Жадаем прыемнага чытання!

Інфармацыя падрыхтавана па матэрыялах Выдавецкага дома “Звязда”.