ПРАВІЛьныя вершы, або ЗАРЫФМАВАНЫЯ ПРАВІЛЫ

ПРАВІЛьныя вершы, або ЗАРЫФМАВАНЫЯ ПРАВІЛЫ

ТВОРНЫ СКЛОН

Мама з татам і з бабуляю дзядуля.

Толькі як вось кожнага ды ў творным склоне

Праскланяць, і ведала, здаецца, Юля,

А пасля канікулаў ніяк не ўспомніць.

Ёй дапамагчы ўсе вучні ў класе хочуць,

Каб змагла запомніць Юля на «выдатна»:

Мамай і бабуляй — калі род жаночы,

А калі мужчынскі — дык дзядулем, татам.

Каб памылак у дыктанце не рабіць,

Трэба гэта й вам таксама завучыць.

 

ЛІЧЭБНІКІ ЛІНА СКЛАНЯЛА

Над лічэбнікамі Ліна

Прасядзела дзве гадзіны,

Вывучаючы старанна,

І цяпер не памыляецца,

Што ў лічэбніках складаных

Частка кожная скланяецца.

Вось, напрыклад, прыклад вам:

У давальным склоне

Мы скланяем: сямістам.

Правіла запомніш,

Сам затым лічэбнік зможаш

Праскланяць у склоне кожным.

Літаратурныя старонкі

ЗАВУЧЫ І ПАЎТАРЫ

Лічэбнік паўтара заўсёды,

Назоўнікам хоць і не грэбуе,

Ды хоча, каб у склоне родным

Назоўнік быў з лічэбнікам.

Пра гэта запытайце ў Янкі,

І ён вам скажа, як адмерае,

Што хлеба паўтары буханкі

На паўбуханкі больш, чым цэлая.

 

ПРЫСТАВУЧАЯ ЛІТАРА

Калі ты смяешся ў лесе,

Дык, нібыта на пацеху,

Ты не толькі сам смяешся,

А з табой смяецца рэха.

Ды зарана ўжо не цешся —

Завучыць я цвёрда раю:

Пішам мы заўжды — «смяешся»,

А «сьмяесься» — вымаўляем.

І дарэмна мне пытанняў

Болей ты не задавай:

Калі с да ш прыстане,

Як два с іх вымаўляй.

Анатоль Зэкаў

 

Стань чытачом або аўтарам часопіса!

Падпісныя індэксы “Бярозкі”:

74822 — індывідуальны 

74888 — індывідуальны льготны для членаў БРПА

748222 — ведамасны 

74879 — ведамасны льготны для ўстаноў адукацыі і культуры