Маркетолагі з бародамі. Як брэнды ствараюць «вайб Новага года»?
Рубрыка: Дайджэст
За акенцам ідзе снег, на плячах — плед, побач стаіць кубак з кавай і патрэсквае свечка з шакаладным пахам. Вайб? Та-ак! Самы добры час, каб даведацца аб працы маркетолагаў у святочныя дні (спраў у іх не менш, чым у Дзеда Мароза).
Гiсторыя i навагоднія трэнды
Калі вы ўважлівы і адданы чытач «Бярозкі», мабыць, узгадаеце снежаньскі нумар за 2024 год. У артыкуле Міхася Мурзы «Гісторыя з’яўлення беларускага Новага года» ёсць дакладная інфармацыя пра святочныя традыцыі нашых продкаў.
Прыкладна з 1525 года, дзякуючы Боне Сфорца, у ВКЛ пачалі спраўляць Новы год, ладзячы балі і маскарады. Так пачалі ўкараняцца традыцыі святкавання. Таксама важнай вяхой у гісторыі фарміравання эмоцый, патэрнаў, знакаў і сімвалаў свята з’яўляецца імя рэвалюцыянера Паўла Постышава. Пасля яго артыкула «Давайце арганізуем да Новага году дзецям добрую ёлку!» савецкія дзеці пачалі вадзіць карагоды вакол ялінак. Усе пачуцці бяруць свае карані з гісторыі.
Што першае прыходзіць на думку, калi кажуць пра Новы год? Мабыць, колеры: чырвоны, залацісты, зялёны, белы? Ёлка, падарункі ды саначкі — зразумела. Пра Дзеда Мароза і Снягурку я ўжо маўчу.
Зараз у трэндзе нацыянальны каларыт і беларускасць. Напрыклад, летась беларускі брэнд «Індычка з Ліды» выпусціў лінейку прадуктаў для запякання пад назвай «Святочная». Кампанія распрацавала канцэпцыю: выкарыстанне ў дызайне традыцыйных матываў беларускага пляцення з саломы, каб падкрэсліць беларускае паходжанне прадукцыі. Усялякiя зоркі, цацкі, сілуэты птушак сталі элементамі «каляднага» дызайну.
Гэта прыклад таго, як брэнды ўкараняюць адметныя рысы, гістарычныя сімвалы, што жывуць у нашай калектыўнай памяці, і пераўвасабляюць іх у сучасным фармаце.
Што за «навагодні маркетынг»?
Ён з’яўляецца значнай часткай падзейнага маркетынгу — стратэгіi прасоўваць тавар, паслугу або брэнд праз пэўныя падзеi, каб выклікаць большы эмацыйны водгук.
Асноўныя асаблівасці святочнага маркетынгу:
- Прадказальнасць. Падзея здараецца кожны год у адзін і той жа час — гэта дае магчымасць планаваць актыўнасці.
- Масавасць. Свята адзначае большасць людзей краіны, незалежна ад веку, полу і сацыяльнага статусу.
- Высокая эмацыйная насычанасць. Новы год асацыюецца з цудамi, утульнасцю, падсумаваннем — моцны эмацыйны фон, на які абапіраюцца маркетолагі.
Стратэгіі брэндаў
Святочны сезон — самы важны ў продажы і пазіцыяванні ды камунікацыі з аўдыторыяй. Планаваць PR-кампанію трэба загадзя — з першым снегам будзе ўжо позна.
Упакоўка. Трэба зрабiць так, каб яна стварала настрой і стала жаданым аб’ектам. Напрыклад, да новага 2026 году, брэнд прысмакаў BonGenie выпусціў калекцыю цукерак у святочнай упакоўцы — «BonGenie Winter Edition 2026». У дызайне выкарыстоўваюцца класічныя навагоднія элементы (эльфавы рукі, ялінкавыя цацкі, сама ж упакоўка аформлена ў зялёны клятчасты «пледавы» ўзор), якія, як сцвярджае брэнд, «дорыць чаканне цуду з усхваляванасцю і ўтульнасць зімовай казкі».
Лімітаваныя калекцыі.
…Працяг чытайце ў часопісе «Бярозка» №12…
Мікіта НЕБЫШЫНЕЦ
Стань чытачом або аўтарам часопіса!
Падпісныя індэксы «Бярозкі»
74822 — індывідуальны
74888 — індывідуальны льготны для членаў БРПА