Беларускія настольныя гульні
Рубрыка: Level 80
На прыродзе, лецішчы, у дарозе ці ў кампаніі сяброў на зімовых вакацыях — настольныя гульні адназначна выйгрышны варыянт баўлення часу ў любым месцы. Вашай увазе прапаную агляд беларускамоўных варыянтаў, якіх, на маё здзіўленне, існуе нямала.
«Мова. Цудоўная»
Колькасць удзельнікаў: 2‒8
Вясёлая настолка, ў якой сабраны 100 цікавых слоў і незвычайных малюнкаў, змешчаных на адпаведнай колькасці картак. У гульні ёсць тры разнастайныя правілы, што і робіць яе цікавай. Гульцы павінны шукаць літары, адгадваць і выдумляць новыя словы. Дадаткам ідзе слоўнік, у якім месцяцца пераклады на рускую і англійскую мовы. Такі варыянт падарунка палепшыць вашыя веды беларускай мовы і зробіць маўленне больш разнастайным. Упэўнены, некаторыя словы стануць для вас адкрыццём.
«1514»
Колькасць удзельнікаў: 2‒6
Ці сапраўды назва гульні звязана з адной гістарычнай падзеяй? Безумоўна. Яе тэма прысвечана бітве пад Воршай, якая адбылася 8 верасня 1514 года. Удзельнікі могуць уявіць сябе на полі бою ў складзе войска аднаго з удзельнікаў канфлікту: ВКЛ або Маскоўскага княства. У свой ход гулец павінен кінуць кубік і перамясціць сваю фігурку на колькасць атрыманых балаў. Далей трэба выконваць заданні на картках і прымаць удзел у баях з супернікамі. Перамогу атрымае той, хто будзе прытрымлівацца правільнай тактыкі. Гэты варыянт можа прывабіць сваёй тэматыкай, бо адразу пагружае ў атмасферу XVI стагоддзя.
«Flixa багацце»
Колькасць удзельнікаў: 2‒10
Гэта першая беларуская эканамічная гульня. Фанатам «Манаполіі» яна спадабаецца. Які прынцып? Гульцы павінны памножыць свой стартавы капітал, зарабіць грошы рознымі шляхамі: гандляваць на біржы, ствараць бізнес і працаваць на рынку нерухомасці. Яшчэ трэба займацца сур’ёзнымі справамі, напрыклад кіраваць рызыкамі і дыверсіфікаваць актывы, весці перамовы і інвеставаць у акцыі і аблігацыі. Удзельнікі могуць ствараць свой капітал з дапамогай фондавага рынку, малога бізнесу, сферы паслуг, нерухомасці, страхавання. Я, напрыклад, вырашыў набыць «Flixa багацце», каб навучыцца гандляваць на біржы, рынку нерухомасці і ўсё ж такі адрозніваць крэдыты ад дэпазітаў.
«Тутэйшыя»
Колькасць удзельнікаў: 2‒6
Толькі ўявіце сабе, што магло б адбыцца, калі б знакамітыя беларусы розных часоў апынуліся ў XXI стагоддзі. На картках ўбачыце пісьменнікаў Уладзіміра Караткевіча, Вінцэнта Дуніна-Марцінкевіча, Янку Купалу, віцебскага мастака Марка Шагала, жонку Сігізмунда Бону Сфорцу. Як бы яны здолелі праявіць сябе, свой талент у наш час? Аднак некаторыя героі маюць двайнікоў. Таму трэба ўключыць кемлівасць і паспрабаваць знайсці іх. У гульні вы апынецеся ў ролі вядомага беларуса, якога чакаюць каверзныя пытанні і загадка, хто з супернікаў можа апынуцца ягоным двайніком.
«Дойліды»
Колькасць удзельнікаў: 1‒6
У мінулым сярод нашых продкаў было распаўсюджана дойлідства. Разнастайныя касцёлы, палацы — прыклад таму. Праўда ж, гучыць неверагодна. Адчуць сябе ў ролі дойліда якраз дапаможа аднайменная гульня. Але без перашкод тут не абыйдзецца. Напрыклад, пабудова будзе знаходзіцца не на вельмі зручным месцы. Будзьце ўважлівымі — і абавязкова пераможаце!
Іван ВАЛУЕЎ,
фота з інтэрнэт-крыніц
Стань чытачом або аўтарам часопіса!
Падпісныя індэксы «Бярозкі»
74822 — індывідуальны
74888 — індывідуальны льготны для членаў БРПА
748222 — ведамасны
74879 — ведамасны льготны для ўстаноў адукацыі і культуры