Па шляхах Уладзіміра Караткевіча
Напрыканцы лета рэдакцыя часопіса «Бярозка» зладзіла тэставую Школу маладога літаратара, каб дапамагчы нашым аўтарам зрабіць першыя пісьменніцкія крокі. У 1952 годзе Уладзімір Караткевіч напісаў эсэ пра вандроўку ў Вязынку — на малую радзіму Янкі Купалы. А мы вырашылі: чаму б праз амаль 70 гадоў не зрабіць тое ж самае? Мясціны і абшары за гэты час не змяніліся, а асэнсаванне рэчаіснасці стала іншым.
У школе прыняла ўдзел моладзь, якая выказала жаданне ўдасканаліць навыкі напісання тэкстаў, знайсці аднагодак-аднадумцаў і пабываць з рэдакцыяй на радзіме паэта.
Праграма была вельмі насычанай. «Літаратары» праехалі больш за паўсотні кіламетраў, даведаліся пра таямніцы жыцця Янкі Купалы, пра багатую творчую дзейнасць Уладзіміра Караткевіча, навучыліся цікава і захапляльна пісаць эсэ, а таксама ўзбагацілі сваю тэатральную нагледжанасць праглядам паказу «Паўлінкі».
Падрабязней пра нашу вандроўку можна прачытаць у эсэ Ангеліны Нарук, якая, па меркаванні рэдакцыі, змагла напісаць яго найбольш пранікнёна і глыбока.
Калі вы не трапілі ў ШМЛ — не сумуйце! Мы плануем гэтую форму камунікацыі з аўтарамі зрабіць традыцыйнай.
P.S. «Бярозка» выказвае шчырую падзяку аўтару рубрыкі Софіі Туронак, выкладчыцы факультэта журналістыкі БДУ Наталлі Саянавай, калектывам музея Янкі Купалы і Нацыянальнага акадэмічнага тэатра імя Янкі Купалы.
Рэдакцыя часопіса
Стань чытачом або аўтарам часопіса!
Падпісныя індэксы «Бярозкі»
74822 — індывідуальны
74888 — індывідуальны льготны для членаў БРПА
748222 — ведамасны