Па шляху бравіста: як стаць б’юці-майстрам
Людзі гэтай прафесіі нібы мастакі ці скульптары. Толькі замест пэндзлікаў і разцоў выкарыстоўваюць алоўкі і пінцэты. Яны надаюць бровам ідэальны выгін, карэктуюць форму дугі, падбіраюць правільныя адценні фарбы, якія спалучаюцца са скурай кліента. Спецыялісты павінны звяртаць увагу да дэталяў, валодаць добрым вакамерам і пачуццём эстэтыкі. Але дзе ж атрымаць навыкі і веды, каб стаць прафесійным бравістам?
Ніводны салон ці студыя прыгажосці не абыходзіцца без майстра па бровах. Часцяком прафесіяналы аддаюць перавагу працаваць на сябе, прымаючы кліентаў дома. А з часам спецыяліст можа весці вэбінары, майстар-класы і анлайн-курсы, каб падзяліцца досведам з пачаткоўцамі.
Якія ж навыкі патрэбны для стварэння кар’еры бравіста?
- Творчы погляд і эстэтычны густ неабходныя, каб бачыць і ствараць гарманічныя формы броваў;
- Цярплівасць і ўвага да дробязі, таму што неабходна працаваць з драбнюткімі элементамі, асабліва ў выпадку руплівай карэкцыі броваў;
- Камунікацыйнасць і добразычлівасць спатрэбяцца, бо важна слухаць і разумець пажаданні кліента, зразумела тлумачыць, што адбываецца падчас працэдуры, а таксама даваць парады;
- Добрая памяць і цвёрдая рука дапаможа бравісту авалодаць адразу некалькімі тэхнікамі накшталт мікраблейдынгу (татуажу), афарбоўванню і ламінаванню.
За сеанс спецыяліст ажыццяўляе працэдуры карэкцыі і афарбоўвання. У іншых выпадках ён можа зграбна аформіць бровы з дапамогай касметыкі. Для надання аб’ёму і стварэння больш натуральнага выгляду майстар можа прапанаваць ламінаванне. Каб вызначыць, які менавіта варыянт падыдзе кліенту, спецыяліст першапачаткова праводзіць кансультацыю. Пасля працэдуры — парады па доглядзе броваў. А таксама майстар павінен увесь час сачыць за алергічнай рэакцыяй скуры на касметычныя сродкі.
Спецыялісту трэба ведаць як мага больш пра будову і тыпы скуры, структуру валасоў і прынцыпы каларыстыкі. Базавыя тэарэтычныя веды можна атрымаць самастойна, а ўжо практычныя ўменні трэба напрацаваць наступнымі спосабамі:
- Індывідуальнае навучанне ў прафесійнага майстра: падчас курсаў дасведчаныя бравісты запрашаюць мадэляў для сваіх вучняў. Такая практыка займае ўсяго пару дзён, але карысць ад яе велізарная;
- Спецыялізаваныя курсы ў навучальным цэнтры: праграма тут разлічана на групавое навучанне, дзе будучыя бравісты атрымаюць разнастайныя веды і пазнаёмяцца з аўтарскімі тэхнікамі. Вучняў чакае шточасавая прапрацоўка практычных навыкаў на мадэлях у абсталяваных класах з неабходнымі інструментамі. Звычайна па заканчэнні навучання такія «школы» прапануюць стажыроўкі і выдаюць дыплом дзяржаўнага ўзору.
Але ёсць і варыянт саманавучання. Падобны шлях выбрала Анжаліка Цвік — топавы бравіст з досведам больш за 10 гадоў. З чаго ж пачыналася яе кар’ера?
— Першапачаткова я планавала стаць візажыстам і вучылася на спецыяльных курсах. Нас знаёмілі з агульнымі тэхнікамі афарбоўвання броваў. Але нейкіх асобных навучанняў па такім вузкім профілі яшчэ не было. Таму даводзілася напрацоўваць досвед самастойна на знаёмых і блізкіх, а ўжо потым праходзіць майстар-класы ў міжнародных бравістаў.
Зараз у маладых спецыялістаў ёсць больш магчымасцяў атрымаць добрую адукацыю. Канешне, метад спроб і памылак зоймае больш часу. Тут трэба заўважыць, што важна абіраць курсы старанна: не па прыгожых афішах, а па работах майстра.
Добрае навучанне і набыццё якасных матэрыялаў для далейшай працы стануць добрым стартам у сферы бравістыкі. Не трэба страшыцца клікаць мадэляў для адпрацоўкі навыкаў. Пачынайце адразу развіваць сацсеткі з прыкладамі сваіх работ. Першыя крокі ў прафесіі будуць няўпэўненымі, але неўзабаве яны стануць трывалымі і вы будзеце выконваць усё правільна!
Такім чынам, навучанне на бравіста — не проста атрыманне навыкаў і ведаў. Гэта шлях, на якім вы станеце майстрам сваёй справы, што будзе здольны дарыць усмешку і ўпэўненасць у сабе. Поспех тут патрабуе сталага развіцця, крэатыўнасці і клопату пра сваіх кліентах. А калі вы адчуваеце асаблівую цягу да прыгажосці і імкненне да дасканаласці, прафесія бравіста можа стаць сапраўды шыкоўным варыянтам.
Кацярына КОРАНЬ,
факультэт журналiстыкi БДУ.
Фота з інтэрнэту і архіву героя.
Стань чытачом або аўтарам часопіса!
Падпісныя індэксы «Бярозкі»
74822 — індывідуальны
74888 — індывідуальны льготны для членаў БРПА