Барбер і цырульнік: мы адзін чалавек?
Рубрыка: PROпрафесію
Гарадская раніца, людзі, якія спяшаюцца па праспекце, далягляд з шэрагу дамоў… Хтосьці хуценька забягае ў цырульню аднавіць прычоску, каб не чакаць вялікую чаргу ўвечары. Але ёсць іншыя месцы — барбершопы. Яны аддалена нагадваюць мужчынскія клубы, у якія завітваюць па новы імідж і прыемныя знаёмствы. Працаўнікі тут літаральна прапагандуюць культуру стрыжкі, стайлінгу барод, вусоў і бакенбардаў. Барберы выдатна разбіраюцца ў модных трэндах, яны здольныя стварыць стыльны выгляд, улічваючы асаблівасці знешнасці і пажаданні кліентаў. Давайце ж хутчэй паглыбімся ў свет нажніц, брытваў і трымераў!
Як і ўсялякі спецыялiст індустрыі прыгажосці, барбер павінен умець ствараць непаўторныя выявы для кожнага кліента. Яго аўдыторыя — як дарослыя мужчыны, так і бязвусыя хлапчукі. Такі майстар адрозніваецца ад класічнага цырульніка вузкай накіраванасцю дзейнасці. Ёсць спецыяліст толькі па барадзе, па вусах, па даўгой ці кароткай стрыжках. Асноўным жа навыкам з’яўляецца мадэляванне — здольнасць зняць валасы пад нуль і зрабіць плаўны пераход да даўжэйшага валосся. Спецыяліст таксама павінен разбірацца ў доглядавых сродках і касметыцы для кансультавання сваёй аўдыторыі. Як бы складана не гучала, але прафесіянал робіць усё хутка і якасна.
Барберам можна стаць у любым узросце, галоўнае — жаданне па-майстэрску працаваць рукамі і шточас вучыцца розным тэхнікам. Месца працы — спецыялізаваныя салоны ці ўласныя студыі. Незалежныя спецыялісты таксама могуць прапанаваць курсы для кар’ерыстаў-пачаткоўцаў.
Што ж трэба ўмець, каб стаць прафесіяналам?
- Догляд валасоў: выконваць стрыжку любой складанасці, афарбоўванне і камуфляванне сівізны;
- Падбор прыдатнай формы барады і вусоў: справа тычыцца мадэлявання і галення рознымі відамі брытваў;
- Стварэнне тэматычных абліччаў: праца над касцюміраванымі вобразамі на розныя выпадкі;
- Кансультацыя кліентаў: веданне асаблівасцяў доглядавай касметыкі, каб даць правільную параду.
Варта разумець, што барбер — камунікабельны і ветлiвы працаўнік, які можа і падтрымаць размову, і стварыць камфортную атмасферу. Важна авалодаць пунктуальнасцю і эмпатыяй. Таксама ў вашым характары павінны пераважаць добразычлівасць, такт і лёгкая харызма.
Тым, хто абраў шлях барбера, не трэба мець вышэйшую адукацыю. Аднак добрым пачаткам у прафесіі стане вучоба ў тэхналагічным каледжы. І нават гэтага можа быць недастаткова. Барберу неабходна шточас удасканальвацца, і такую магчымасць даюць курсы. Месячнае навучанне насычана лекцыямі, семінарамі і практыкай. А пасля выніковага іспыту выпускнікі атрымаюць сертыфікат ці дыплом спецыяліста.
Менавіта так адкрыла для сябе свет барберынгу дзейны майстар мужчынскага салона Вікторыя Ерафеева:
— У сферы цырульніцкага мастацтва я ўжо каля 3 гадоў, а пачынала свой шлях з навучання ў Гродзенскім каледжы. Пасля атрымання «скарыначкі» вырашыла для сябе, што хачу займацца выключна мужчынскімі стрыжкамі.
Зараз я магу параіць пачаткоўцам, што трэба пачынаць практыкавацца ў месцах, дзе стрыжкі каштуюць няшмат. Гэта дапаможа «набіць» руку без непатрэбных згрызот сумлення і набыць навык камунікабельнасці. Бо майстар — свайго роду псіхолаг. І калі навучыцца добра размаўляць, кліент вернецца яшчэ не адзін раз.
Барбер-пачатковец павінен разумець: пасля адных курсаў прафесіяналам адразу не станеш. Паколькі наша сфера не стаіць на месцы, трэнды ўвесь час змяняюць адзін аднаго, а кліенты хочуць выглядаць сучасна. Калі ўжо вы вырашылі прайсці навучанне, то не варта абіраць настаўніка, які працуе на струмень людзей. Лепей вучыцца ў настаўнікаў з вялікім стажам працы, хаця гэта і можа быць даражэй, але ўсе пытанні сапраўды будуць вырашаныя!
Такім чынам, калі прафесійны пачатак ужо пакладзены, то ні ў якім разе не спыняйцеся на дасягнутым. Навучанне і самаразвіццё ўвесь час павінны суправаджаць спецыяліста-пачаткоўца. Стварайце партфоліа, вядзіце сацыяльныя сеткі, удзельнічайце ў абмене досведам і напрацоўвайце рэпутацыю ў сваёй галіне!
Кацярына КОРАНЬ,
факультэт журналiстыкi БДУ
Стань чытачом або аўтарам часопіса!
Падпісныя індэксы «Бярозкі»
74822 — індывідуальны
74888 — індывідуальны льготны для членаў БРПА