Спартыўны віш-ліст на Новы год
Літаральна некалькі дзён засталося да самага доўгачаканага свята — Новага года. Вядома, усе лісты да Дзеда Мароза ўжо напісаны, але мы пацікавіліся ў спартсменаў і трэнераў-выкладчыкаў аддзялення спартыўнай акрабатыкі Рэспубліканскага цэнтра алімпійскай падрыхтоўкі па гімнастычных відах спорту, што яны хацелі б атрымаць у падарунак.
Вольга Аляксандраўна Вашчанка, трэнер-выкладчык:
— Я хацела б атрымаць падарожжа. Таму што з часам стамляешся ад руціннай працы ў зале і хочацца змяніць абстаноўку, а потым вярнуцца з радасцю і новымі сіламі. Мае родныя ўжо зрабілі мне падарунак: мой стрыечны брат купіў мне пуцёўкі ў Турцыю і ў Кыргызстан. У Турцыі я была некалькі разоў, і яна пакінула прыемныя ўражанні. А вось у Кыргызстане — ніводнага разу. Гэта будзе цікавы вопыт, і я чакаю яго з нецярпеннем.
Анастасія Ігараўна Кібалка, трэнер-выкладчык:
— Хачу сустрэць Новы год у іншай краіне разам са сваёй сям̕ёй. Гэта, напэўна, мая самая галоўная мара. Вось што я хацела б атрымаць, дык гэта якія-небудзь курсы, таму што баюся рызыкаваць і не магу перабароць унутраны страх, што штосьці не атрымаецца. Спадзяюся, што ў новым годзе перамагу гэту няўпэўненасць.
Ганна Кашко, 13 гадоў:
— У гэтым годзе я ўпершыню паглядзела папулярны серыял «Вельмі дзіўныя справы», у якога выйшаў пяты сезон. Мне вельмі спадабалася. І я ўбачыла ў магазіне «Pandora» калекцыю біжутэрыі з яго героямі, таму на Новы год хацелася б атрымаць бранзалет адтуль.
Карына Качан, 14 гадоў:
— Я, як і многія іншыя спартсмены, хацела б здаровыя калені і спіну. (Смяецца.) Але самае галоўнае для мяне — гэта, канечне, здароўе маёй сям̕ і.
Даяна Танковіч, 9 гадоў:
— У мяне ёсць сабака пароды коргі па мянушцы Бадзі, і я хацела б завесці яму сябра — нямецкую аўчарку, каб адзін ён не сумаваў.
Васіліса Трус, 16 гадоў:
— Добрыя сябры — гэта, на мой погляд, усё, чаго можна жадаць. Я вельмі ганаруся тым, што магу так назваць людзей побач са мной. Зычу, каб яны былі ў жыцці кожнага. І, вядома, здароўе маіх родных.
Ліза Радыёнава, 13 гадоў:
— Я хацела б паехаць у вандроўку. Спачатку па Еўропе, каб убачыць такія сталіцы свету, як Парыж і Рым. Потым — па Азіі. Не магу выбраць толькі адну краіну, якую хачу наведаць: мяне вабяць усе! Выключэнне — Паўночная Карэя. (Смяецца.)
Як бачым, для шчасця трэба не так і многа 🙂 Жадаем нашым спартсменам новых перамог, а ўсім чытачам — святочнага настрою і веры ў цуды! Шчаслівага Новага года!
Вера КУЧЫНСКАЯ,
СШ №16 г. Мінска, 10 клас
Стань чытачом або аўтарам часопіса!
Падпісныя індэксы «Бярозкі»
74822 — індывідуальны
74888 — індывідуальны льготны для членаў БРПА